Text: 山並
個個女人都問過男人：「覺唔覺得我近排好似肥咗？」有啲仲勁：「死喇我右邊小腿粗咗呀！粗過尋日0.56cm呀！0.56cm呀！！」
我想同問過我呢個問題嘅女人講：你邊度都唔肥！
雖然我最後都係飛咗你。
我現任女友一覺得自己稍為肥咗，就少不免要捉我問：「我第時變咗肥婆你會唔會唔要我？」懂事的男人都識答：「點會呢？我肥過你咪得囉！」、「傻豬，肥咗啫又唔係變第二個人，我一樣咁愛你個喎！」、「我其實最鍾意食肥！」
好多女人覺得「男人其實鍾意有肉地嘅女人」係呃人嘅，係男人睇唔過眼女人沉迷減肥而作出嚟嘅口號。不過呢句說話其實真到爆，女人調番轉諗吖，如果男朋友瘦到馬騮咁，摸呢度又係骨攬嗰度都係骨，係咪少咗好多樂趣？
女人希望男人有樓揸手，男人，亦都想有啲嘢「揸手」嘅。講緊嘅唔一定係大胸，至少我哋溫存嗰時，都唔好成日覺得好似俾幾條工字鐵銀住咁吖！
死都要瘦呢種雌性諗法其實唔難理解，因為根本成個社會都歧視肥人，而根本，女人比男人更加歧視肥女人！
好吖你咁叻咁食得肥，唔去搵個肥過肥姐嘅？
呢個例子太極端，女人唔可以用嚟質問男人，因為而家啲女人減肥，都係用緊啲好極端嘅完美身形嚟做目標。呢個世界唔係all or nothing、唔係周秀娜or肥姐的，我都冇要求你fit到同娜姐一樣，做乜就要「鍾意女人有肉地」嘅我去搵勁肥嘅人？
女人啊，肥真係唔係問題，食食下腸胃就會習慣。街外人睇嘅係你肥定瘦、識唔識著衫、個頭染得好唔好；我同你一齊，除咗外形，仲會睇你其他嘢家嘛！
所以，我最後都係飛咗你，唔係因為你肥或者走樣，係因為你有第二啲嘢，比肥同走樣更加趕客難頂。
講到尾，女人們，真係唔好減肥減到上腦，叉燒太瘦都唔好食啦，何況係人呢
B: 1.5片麥吐司+200K麥纖餅+1個火龍果
L: 80G古古力
A: 六千館
D: 一品香+半瓶啤酒
E: 0
